Një grua e moshuar gjeorgjiane po kërkonte bakër për ta shitur si skrap kur aksidentalisht preu një kabllo nëntokësore dhe ndërpreu shërbimet e internetit për të gjithë Armeninë fqinje.

Gruaja, 75 vjeçe, kishte gërmuar për metalin jo shumë larg kryeqytetit Tbilisi, kur lopata e saj dëmtoi kabllon me fibra optike.

Ndërsa Gjeorgjia i siguron rreth 90% të internetit të Armenisë, sabotimi i padashur i gruas pati pasoja katastrofike. Përdoruesit e uebit në vendin prej 3.2 milionë banorësh u lanë duke tundur gishtin e madh deri në pesë orë pasi ofruesit kryesorë të internetit të vendit – ArmenTel, FiberNet Communication dhe GNC-Alfa – u penguan të ofrojnë shërbimin e tyre normal. Pamjet televizive treguan gazetarët në një agjenci lajmesh në kryeqytetin Jerevan duke ngulur zgurdulluar sytë në ekranet bosh.
Pjesë të mëdha të Gjeorgjisë dhe disa zona të Azerbajxhanit u prekën gjithashtu.

“Ishte një grua 75-vjeçare që po gërmonte për bakër në tokë në mënyrë që ta shiste për skrap”, tha një zëdhënës i ministrisë së brendshme të Gjeorgjisë.

E quajtur “hakeri me lopatë” nga mediat lokale, gruaja – së cilës nuk i përmendet emri- është duke u hetuar me dyshimin për dëmtim të pronës. Ajo përballet me tre vjet burg nëse akuzohet dhe shpallet fajtore.

Një zëdhënës i ministrisë së brendshme të Gjeorgjisë tha se gruaja u lirua përkohësisht “për shkak të moshës së saj të vjetër”, por mund të përballet me më shumë akuza.

Dëmi u zbulua nga një sistem monitorimi i lidhjes me fibra optike nga Evropa Perëndimore dhe një ekip sigurie u dërgua menjëherë në vendngjarje, ku gruaja edhe u arrestua më pas. Ministria e Brendshme tha se ajo nuk kishte bashkëpunëtorë.

Kablloja është në pronësi të rrjetit hekurudhor të Gjeorgjisë. Është shumë e mbrojtur, por rrëshqitjet e dheut apo shiu i dendur mund ta kenë ekspozuar atë ndaj pastruesve.

Tërheqja e kabllove të bakrit të papërdorura për skrap është një mënyrë e zakonshme për të fituar para në ish-Bashkimin Sovjetik. Disa sipërmarrës kanë përdorur madje traktorë për të nxjerrë qindra metra kabllo nga ish-qendra e testimit bërthamor në Semipalatinsk në Kazakistan.